Адкрыццё малой радзімы

Дата: 11 июля 2018 в 11:15, Обновлено 11 июля 2018 в 11:27

Автор: Терещенко Т. И.

1 243 просмотра

Другі год запар на базе Крынічанскай сярэдняй школы Мазырскага раёна, якая з’яўляецца раённым рэсурсным цэнтрам па інавацыйнай і эксперыментальнай дзейнасці, праводзіўся фестываль інавацыйных педагагічных ідэй “Адкрыццё”.

Сёлета ён сабраў больш за 100 удзельнікаў са школ Мазырскага і Нараўлянскага раёнаў. Фэст накіраваны на павышэнне якасці адукацыі, развіццё рэгіянальнага супрацоўніцтва ў педагагічным асяроддзі, выяўленне і падтрымку таленавітых, актыўных педагогаў і навучэнцаў. Ён праводзіцца з мэтай абагульнення, прадстаўлення і трансляцыі інавацыйнага прафесійнага вопыту.

За 2 фестывальныя дні прадстаўнікі ўстаноў адукацыі абаранілі свае праекты, у творчай форме падзяліўшыся вопытам працы, прадэманстравалі на выставе разнастайныя прадукты інавацыйнай дзейнасці, правялі майстар-класы.

У Крынічанскай школе ў гэтым годзе завяршаецца работа над інавацыйным праектам “Укараненне мадэлі дзіцяча-дарослай агульнасці як механізма фарміравання новых сацыяльных практык у адукацыйнай прасторы рэгіёна”. Якая ж дзейнасць хаваецца за складанай назвай? Навучэнцы расказалі, што над стварэннем прадстаўленых прадуктаў інавацыйнай дзейнасці 3 гады працавалі і яны самі, і іх бацькі, і педагогі ўстановы. Пачыналася работа з вывучэння легенд і гісторыі роднага пасёлка. Былі адабраны, апрацаваны і ілюстраваны самыя цікавыя з іх. Затым старанна вывучылі флору і фаўну сваёй мясцовасці. Вынікам гэтага стала стварэнне Чырвонай кнігі расліннага і жывёльнага свету пасёлка Крынічны. Хлопчыкі і дзяўчынкі, успамінаючы, як вялася работа, з усмешкай адзначылі, што бліжэй пазнаёміліся і з задавальненнем пагутарылі са многімі жыхарамі пасёлка. Далей пасёлак вывучаўся літаральна ўздоўж і ўпоперак. Знаёмячыся бліжэй з работай “Рэкорды Крынічнага”, можна даведацца аб самай доўгай і самай кароткай вуліцы, найбольш заселенай ці самай важнай, а таксама самай зялёнай. Акрамя таго, шмат сабрана цікавай інфармацыі і пра людзей пасёлка: хто быў першым яго жыхаром, хто найстарэйшы, а хто — самы маленькі. Таксама ўдзельнікі праекта падрабязна вывучылі гісторыю сваёй школы з часу яе адкрыцця, падлічылі, колькі медалістаў выйшла з яе сцен, пазнаёміліся з усімі кіраўнікамі і выдатнымі педагогамі, якія працавалі ў школе, і даведаліся яшчэ нямала цікавых фактаў. Напрыклад, бя-розавая алея, якая прывычна цешыць погляд мясцовых жыхароў і прыгажосць якой абавязкова адзначаюць усе госці пры ўездзе ў пасёлак, была пасаджана першымі выпускнікамі школы 1975/1976 навучальнага года.

Быў распрацаваны цыкл класных гадзін, мэта якіх — пашырэнне і паглыбленне ведаў пра гісторыю, культуру і інфраструктуру роднага краю, гісторыю і традыцыі школы, знаёмства з людзьмі, якія ўславілі пасёлак Крынічны. У рамках работы над праектам створаны віртуальны музей вядомага навукоўца-генетыка акадэміка П.Ф.Ракіцкага. Апошні год вялася работа над міні-праектамі “Крынічны — куток Мазыршчыны”, “Вядомыя людзі пасёлка Крынічны” і “Педагагічныя дынастыі”. Быў распрацаваны экскурсійны тур “Крынічны — наша малая радзіма”, з дапамогай якога можна здзейсніць завочную экскурсію па самых прыгожых мясцінах пасёлка, пазнаёміцца з помнікамі прыроды, размешчанымі на яго тэрыторыі, акунуцца ў гісторыю мясцовых прадпрыемстваў.

Бацькі разам са сваімі дзецьмі прадстаўлялі прадпрыемствы, на якіх працуюць ужо шмат гадоў, расказалі аб асноўных напрамках работы, прадукцыі і перспектывах атрымання працоўных месцаў для будучых выпускнікоў.

Як бачым, інавацыйны праект — даволі цікавая работа. Такая дзейнасць цалкам адпавядае палітыцы дзяржавы ў Год малой радзімы, выхоўвае чалавека духоўна багатага, які з павагай ставіцца да навакольных, гісторыі і прыроды роднага краю, сваёй нацыянальнай культуры.

Фестываль набывае ўсё больш сяброў, колькасць удзельнікаў, якія трансліруюць інавацыйны вопыт, павялічваецца з кожным годам. Пастаяннымі гасцямі яго з’яўляюцца навуковыя кансультанты інавацыйных праектаў. Як адзначыў намеснік дырэктара філіяла Рэспубліканскага інстытута прафесійнай адукацыі “Рэсурсны цэнтр “ЭкаТэхнаПарк — Волма” член экспертнага савета фестывалю Аляксей Воранаў, інавацыйная дзейнасць дазваляе фарміраваць функцыянальную дасведчанасць навучэнцаў, спрыяе іх паспяховай сацыяльнай адаптацыі.

Таццяна ГОЛУБ,
намеснік дырэктара па вучэбнай рабоце
Крынічанскай сярэдняй школы Мазырскага раёна.

Все новости

Комментарии:

Оставлять комментарии могут только авторизованные посетители.